កម្សាន្ត៖ ក្រុមហ៊ុនហ្គេមបាល់ទាត់ EA Sports បានទម្លាយចេញនូវកីឡាករដែលជាម៉ូឌែលក្របមុខនៃហ្គេមរបស់ខ្លួន សម្រាប់ប្រភេទ Edition ចុងក្រោយបង្អស់ក្នុងឆ្នាំ២០២២ ឬហៅថា FIFA22 ដែលនឹងបញ្ចេញឱ្យអ្នកគាំទ្រអាចទាញយកមកលេងបានឆាប់ៗនាពេលខាងមុខ។

នៅក្របមុខរបស់ហ្គេម FIFA22 នេះ បានជ្រើសរើសយកកីឡាករវ័យ២២ឆ្នាំ សញ្ជាតិបារាំង Kylian Mbappe ដែលពាក់អាវក្លិប Paris Saint-Germain រដូវកាលថ្មី បើទោះបីជាកីឡាកររូបនេះមានពាក្យចចាមរ៉ាមច្រើនលើសលុបអំពីការផ្ទេរទៅកាន់ក្របខណ្ឌ La Liga ជាមួយក្លិប Real Madrid យ៉ាងណាក្តី។

ក្រោយពេលឃើញមុខ Mbappe ពាក់អាវ PSG លើក្របមុខរបស់ហ្គេម FIFA បែបនេះ អ្នកគាំទ្រភាគច្រើនគិតថាទំនងជានឹងឃើញមុខកីឡាកររូបនេះបន្តស្នាក់នៅជាមួយក្លិបអ្នកមានបារាំងនេះបន្តនៅរដូវកាល ២០២១/២២ ប៉ុន្តែយ៉ាងណាមិញ កន្លងមកគេក៏ធ្លាប់ឃើញមានកីឡាករដែលបង្ហាញមុខលើក្របរបស់ហ្គេម FIFA ហើយក៏ផ្លាស់ទៅកាន់ក្លិបថ្មីនៅពេលក្រោយផងដែរ។ ជាក់ស្តែង កីឡាករ Cristiano Ronaldo បានបង្ហាញមុខជាមួយឯកសណ្ឋាន Real Madrid នៅលើក្របហ្គេម FIFA19 ហើយក្រោយមកក៏បានផ្លាស់ប្តូរទៅកាន់ក្លិប Juventus តែម្តង៕